नई दिल्ली : ऐत्वार 28 दिसम्बर 2025 खुणि गढ़वाल भवन म गढ़वाल हितैषिणी सभा द्वारा आयोजित सम्मान समारोह म वरिष्ठ साहित्यकार श्री ललित केशवान, श्री जबर सिंह कैंतुरा व श्री दिनेश ध्यानी तैं वीर चन्द्र सिंह गढ़वाली स्मृति साहित्य सम्मान प्रदान करेगे। ये समारोह म साहित्य का अतिरिक्त समाजसेवा समेत कै हौरि बिधाओं का लगभग चालीस विभूतियों तैं सम्मानित करेगे।
गढ़वाल हितैषिणी सभा द्वारा पैलि दौं गढ़वाल भवन स्थापना दिवस मनयेगे।
गढ़वाल हितैषिणी सभा की स्थापना एक सौ साल पैलि 1923 म ह्वे छै। अर साल 1958 दिल्ली पंचकुईया मार्ग म गढ़वाल भवन की नींव रखे गे छै। सौ साल से बि बिंड्या साल बिटिन गढ़वाल हितैषिणी सभा लगातार काम करणी च। दिल्ली की सौ साल पुरणि संस्थाओं म हितैषिणी बि दुसरा या तिसरा नम्बर परैं छ। उत्तराखण्ड समाज का गौरव व हमरि सांस्कृतिक, सामाजिक बिरासत गढ़वाल भवन अमणि हर क्षेत्र म अतुलनीय काम करणों। पूर्व म सभा दगडि कुछ विवाद बि रैन व एकाद मामला अज्यों बि छन पर गढ़वाल हितैषिणी सभा लगातार अगनै बढ़णी। हाल ही म सभा ला उत्तराखण्ड मुख्यमंत्री कोष साढ़े तीन लाख रुपया सहयोग राशि भेंट कैरि। मतलब सभा हर क्षेत्र म काम कनी।
गढ़वाल हितैषिणी सभा का अध्यक्ष श्री सूरत सिंह रावत, महासचिव श्री पवन कुमार मैठाणी द्वारा उपस्थित मैमानो का दगड़ि उक्त प्रतिभाओं कु सम्मान करेगे।
ज्ञातव्य हो कि वरिष्ठ साहित्यकार श्री ललित केशवान जी ला बाल साहित्य, हास्य समेत हर बिधा म गढ़वाळि, हिन्दी म द्वी दर्जन से बिण्ड्या पोथी लिखीं छन। आप पिछला साठ साल से बि बिंड्या बगत बिटिन लगातार साहित्य सेवा कना छन। डाक्टर सतीश कालेश्वरी जी तैं बि सिनेमा खुणि लगातार गीत लिखणा खातिर सम्मानित करेगे। वरिष्ठ साहित्यकार श्री जबर सिंह कैंतुरा जी की गढ़वाळि म कै पोथी लिखीं छन। साहित्यकार श्री दिनेश ध्यानी उत्तराखण्ड लोक-भाषा साहित्य मंच दिल्ली का संयोजक छन। आप लगातार नै पीढ़ी तैं गढ़वाळि भाषा शिक्षण कक्षाओं का माध्यम से भाषा सिखौणा छौ। गढ़वाळि, कुमाऊनी भाषाओं तैं संविधानै आठवीं अनुसूची म शामिल कना खातिर लगातार जतन करणा छौ। आपन गढ़वाळि कै पोथी लिखीं छन व आपन कै अन्य भाषा कि पोथ्यों कु अनुवाद गढ़वाळि भाषा म कैरि व लगातार भाषा संरक्षण का खातिर काम करणा छौ।
सभा द्वारा कै पत्रकारों तैं बि सम्मानित करेगे। श्री सुनील नेगी जना पत्रकारों ला नै पीढ़ी तैं लेखन का क्षेत्र लगातार प्रेरणा दे। श्री नेगी समाज का हर सुख-दुख म अगनै रंदन। सभा द्वारा समाजसेवी व वरिष्ठ लोगों तैं बि सम्मानित करेगे। गढ़वाल हितैषिणी सभा द्वारा सभा भवन दिवस पैलि दौं यनु काम कैरि।
ये समारोह म गढ़वाली कुमाऊनी जौनसारी भाषा अकादमी का माध्यम से श्री सर्वेश्वर बिष्ट व वोंका ग्रुप का माध्यम से भौत बढ़िया सांस्कृतिक कार्यक्रम प्रस्तुत करेगे। सुप्रसिद्ध लोक गायिका श्रीमती मनोरमा तिवारी भट्ट समेत कै कलाकारों की प्रस्तुति की लोगों ने खूब सराहना कैरी। ये आयोजन म हाल ही म भारतीय प्रशासनिक सेवा नै अधिकारी प्रद्युम्न बलोधी बि उपस्थिति छाया।
ये सम्मान समारोह म समाज का विभिन्न क्षेत्रों म अग्रणी लोगों ल भाग ले। जौं म सुप्रसिद्ध समाजसेवी मयूर पब्लिक स्कूल का चेयरमैन श्री मनवर सिंह रावत, दिल्ली विधानसभा उपाध्यक्ष श्री मोहन सिंह बिष्ट, टिहरी की सांसद श्रीमती माला राज्य लक्ष्मी शाह, टिहरी का विधायक श्री किशोर उपाध्याय, वरिष्ठ साहित्यकार श्री रमेश चन्द्र घिल्डियाल सरस, फिल्म निर्देशक श्रीमती सुशीला रावत, गढ़वाल हितैषिणी सभा का पूर्व अध्यक्ष श्री नरेन्द्र सिंह नेगी, उत्तराखण्ड लोक मंच का अध्यक्ष श्री बृजमोहन उप्रेती, श्री चन्दन प्रेमी, वरिष्ठ कवि सिने अभिनेता श्री बृजमोहन वेदवाल, श्री सुशील बुडाकोटी, श्री जगमोहन सिंह रावत जगमोरा, गढ़वाली कुमाऊनी जौनसारी भाषा अकादमी का सचिव श्री संजय गर्ग जी, श्री दर्शन सिंह रावत, श्री ललित केशवान, श्री जबर सिंह कैंतुरा, श्री दिनेश ध्यानी, श्री बृजमोहन वेदवाल, श्री जयपाल सिंह रावत, श्री द्वारिका प्रसाद चमोली, पत्रकार श्री दाताराम चमोली, श्री सुरेशानन्द बसलियाल, उद्यमी श्री मुकेश हिंदवान, श्री भाष्करानंद कुकरेती, श्री अनिल कुमार पंत, नवभारत टाइम्स कि वरिष्ठ पत्रकार श्रीमती पूनम बिष्ट, सुप्रसिद्ध लेखिका डाक्टर हेमा उनियाल, ब्लागर श्रीमती संतोषी डोभाल, ग्रामीण पत्रकार श्री जगमोहन सिंह डांगी, फिल्म निर्देशक श्री अनुज जोशी, ऱगमंच बिटिन श्रीमती सुशीला रावत, श्री राकेश गौड़, अलकनंदा का संपादक श्री विनोद ढौंडियाल, समेत गढ़वाल हितैषिणी सभा की समस्त कार्यकारिणी अध्यक्ष श्री सूरत सिंह रावत, महासचिव श्री पवन कुमार मैठाणी, उपाध्यक्ष श्री शैलेन्द्र सिंह नेगी, श्रीमती रेनू उनियाल, श्री राजेन्द्र चमोली, समेत समाज का कै प्रबुद्ध लोग उपस्थित छाया। कार्यक्रम कु संचालन महासचिव श्री पवन कुमार मैठाणी ला कैरि।
0 टिप्पणियाँ