नई दिल्लीः दिल्ली म बुल्दन कि उत्तराखण्ड का लगभग तीस लाख लोग निवास कर्दन पण अज्यों तलक यों लोगों तैं दिल्ली म उचित राजनैतिक प्रतिनिधित्व कै बि दल न नि देन। हाल सि छन कि लोक सभा अर विधानसभा ता दूर कै दल त यना छन जु एक निगम पार्षद की सीट बि उत्तराखण्ड समाज तैं नि देंदा। ये का कै कारण ह्वै सकदन अर कुछ उत्तराखण्डी समाज की बि अपणि कमी ह्वै सकदन जनुकि बुले जांद कि यखा लोग एकजुट नि छन। सब्यों कि अपणि-अपणि ढपली छन अर अपणां राग छन। कुछ हलकों म य बात बि सौ आना सै चा कि यखा बिण्डी संस्था सालभर गीत, गाणों अर मैफिल सजाण म हि लगीं रंदन। वों का ऐजेण्डा म क्वी बि गंभीर विषय य समाज व उत्तरखण्ड का क्वी मुद्दा शामिल नि रैंदा। इलै अमणि तलक नेता अर राजनैतिक दल समझदा छया कि सि लोग सांस्कृतिक आयोजनों तक सीमित छन ता वों बि यों तैं सांस्कृतिक आयोजन चुनौ का टैम परैं करौंदा छाया अर वोट बैंक सधणा खुणि यों मंचों कु भरपूर माध्यम बणौंदा छाया। जौं कुछ लोगों न पार्षद या विधायकी पै बि हो वोंका अपणा निजी जतन छाया जौंम एक जमना म सर्वश्री कुलानन्द भारतीय, डॉ खुशहालमणी घिल्डियाल , मोहन सिंह विष्ट, मुरारी सिंह पंवार, रामचन्द्र सिंह, जगदीश मंगें अर वांका बाद एक लम्बी फेहरिस्त चा जौं नेतों न मुकाम हासिल कैरि। अमणि कुछ हौरि बि पार्षद छन पण जु मुकाम अर हिस्सेदारी मिलण चैणीं छै व उत्तखण्डी समाज तैं दिल्ली म अज्यों बि नि मीलि।
लेकिन अब जरा-जरा कै हि सै पण उत्तराखण्डी समाज दिल्ली म एकजुट होण लग्यों चा। येकि पैलि सफलता चा दिल्ली म गढ़वाली, कुमाउनी, जौनसारी अकादमी को गठन। रामलीला मैदान म 15 नवम्बर, 2016 खुणि आयोजित गैर राजनैतिक विराट जनसभा जैम दिल्ली का तमाम संगठनांे की भागीदारी रै। मुख्य रूप से उत्तराखण्ड एकता मंच का बैनर तले सब्बी संगठनों ला अपणु सहयोग ईमानदारी से दे। तब लागि कि क्वी बि समाज अगर ठाणि द्या ता क्या नि कैरि सकदु?
अमणि दिल्ली एनसीआर का संगठनों का तरपां बिटिन एक आवाज उठणीं चा कि आगामी लोकसभा, 2024 म दिल्ली की एक लोक सभा सीट उत्तराखण्डी समाज तैं राजनैतिक दलों तै देण चंदन। वन ता कै दावेदार होला कि हम तैं लोकसभा या विधानसभा टिकट मिलण चैंद पण यख खास बात या चा कि दिल्ली म रैण वळा अधिकांश लोग अर संगठनों की पैलि पसंद सुप्रसिद्ध उद्यमी, डीपीएमआई का चेयरमैन, मयूर विहार जिला का पूर्व अध्यक्ष अर दिल्ली प्रदेश म सचिव डॉ विनोद बछेती पैलि पसंद छन। जगा-जगा य मांग जोर पखडणीं चा कि आगामी लोक सभा चुनाव म भाजपा डॉ विनोद बछेती तैं टिकट देकि उत्तराखण्डी समाज तैं उचित राजनैतिक प्रतिनिधित्व द्या।
ज्ञातव्य हो कि डॉ बछेती पिछला कै सालों बिटिन दिल्ली, एनसीआर म काफी लोक प्रियता हासिल करण वळा मनीषियों म अग्रणी छन। भाषा आन्दोलन हो चा समाज का क्वी बि विषय हो डॉ बछेती हर जगा अपणि भागीदारी सिद्दत से निभौंदन। समाज का हर वर्ग तैं दगड़ि लिजाणा कि सोच अर हर हाल म उत्तराखण्डी समाज की पीड़ा अर दर्द तैं अपणि आवाज देणु बछेती कि पहचान चा। इलै जब दिल्ली म उत्तराखण्डी समाज तैं लोक सभा म प्रतिनिधित्व की बात समणि ऐ ता सब्यों कु बुलणु छौ कि डॉ विनोद बछेती हर प्रकार से लोकसभा म जाण कि प्रतिभा रखदन। हौरि त हौरि वोंका जु राजनैतिक विरोध दलांे म बि छन वो बि मनदन कि अगर डॉ बछेती तैं टिकट मिल्दा ता य उत्तराखण्डी समाज खुणि भौत ही बढ़िया बात होलि।
अब द्यखण वळि बात या चा कि यीं मुहिम तैं उत्तराखण्डी समाज अमलीजामा पहराण खुणि क्या जतन करदा अर राजनैतिक दल कतगा वों कि बातों परैं ध्यान देंदन। खासकर भाजपा जैं पार्टी खुणि बुल्दन कि दिल्ली म अगर जु बि राजनैतिक प्रतिनिधित्व उत्तराखण्डी समाज तैं मिलि बि हो ता भाजपा ला हि दे। सब्यों कि उम्मीद चा कि युवाओं तैं राजनीति कि अग्रिम धारा म ज्वडण वळा प्रधानमंत्री मोदी जी जु कि उत्तराखण्ड अर यखा लोगों का प्रति अपार स्नेह रखदन अर कुशल अध्यक्ष नड्डा जी उत्तराखण्डी समाज तैं दिल्ली म कतगा महत्व देंदन। य यीं बात परैं निर्भर कारलु कि औण वळा दिनांे दिल्ली एनसीआर का प्रवासी-रैवासी कतगा सिद्दत से अपणि बात रखदन। लेकिन य बा बिल्कुल सै च कि अब उत्तराखण्डी समाज तैं विधानसभा, लोक सभा म उचित प्रतिनिधित्व दिये जाण चैंद। अगर यु समाज अमणि बि अलग-थलग रालु अर सिरप नेतों खुणि मंच सजाण म मस्त रालु ता फिर अगनै कैन बि राजनैतिक प्रतिनिधित्व की बात नि करणी अर न कैल यतगा सिद्दत से अगनै औणु। इलै अबरि मौका बि चा अर माहौल बि चा ता उम्मीद चा कि उत्तराखण्ड का लोग दिल्ली म अपणि एकता दिखाला अर औण वळु लोक सभा चुनाव म एक सीट जरूर अपणा समाजा खुणि पक्की कारला।
दिनेश ध्यानी
0 टिप्पणियाँ